Qarshi muhandislik-iqtisodiyot institutidan B.M. Toshmamatov, O.I. Raxmatov va S.T. Valiyev hamda Buxoro muhandislik-texnologiya institutidan Sh.X. Nurmanov geotermal suvdan foydalanadigan va mahalliy iqlim sharoitini hisobga oladigan, issiqlik nasosiga asoslangan gibrid isitish sxemasini taklif qilgan. Maqola 2023-yil 10-sentabrda «Muqobil energetika» jurnalida chop etilgan.
Mualliflar Qashqadaryo viloyatining Koson, Muborak, Nishon va Qamashi tumanlarida geotermal suvlarning harorati va sarfini o‘lchagan, suvning laboratoriya kimyoviy tahlili natijalarini keltirgan hamda avtonom issiqlik ta’minoti tizimining issiqlik quvvatini hisoblash usulini bayon qilgan.
Ularning hisobiga ko‘ra, geotermal suvdan foydalanish koeffitsiyenti faqat isitish uchun 0,35 ni, isitish, ventilyatsiya va issiq suv ta’minoti birgalikda olinganda esa 0,42 ni tashkil etadi.
